الاعلان عن توأمة بين أكاديميتي “ايليت” و”اينرجي” بكرة السلة

جرى الاعلان عن توأمة بين أكاديميتي “ايليت” و”اينرجي” لكرة السلة خلال مؤتمر صحافي حاشد عقد في مقر نادي عمشيت، بحضور رئيس نادي عمشيت يوسف قصيفي واعضاء اللجنة الادارية، المشرف على أكاديمية “أينرجي” غازي بستاني(قائد منتخب السابق ورئيس لجنة المنتخبات الوطنية في اتحاد كرة السلة)،المشرف على أكاديمية “ايليت” اللاعب الدولي السابق والمدرب صباح خوري،عدد من المدربين ولاعبي كرة السلة ورجال صحافة واعلام.

الاعلامي سابا

بداية النشيد الوطني اللبناني فكلمة ترحيبية من عرّيف الحفل الاعلامي راوي سابا رّحب فيها بالحاضرين و تحدث فيها عن ماهية المؤتمر الصحافي الذي يستضيفه نادي عمشيت “هذا النادي النشيط والذي يقوم بنشاطات رياضية وفكرية على مدار السنة ويُعتبر أحد ابرز الأندية اللبنانية من حيث النشاط الرياضي “.

قصيفي
الكلمة الثانية لقصيفي جاء فيها:”هيدا النادي يللي تعوّد على انو يكون من الطليعيين بالمجالات الريّاضية وبتطوير اللاعبين، وكان دايماً عندو دور ريادي على كافة الصعد بين اندية بلاد جبيل وعلى صعيد الوطن.
هالمناسبة اليوم من المناسبات الاعز على قلبي، من وقت ما تسلّمنا الأمانة، لأنو بالرغم من كل الانجازات يللي عملناها، بيبقى الهدف الاسمى لكل نادي رياضي، تعليم وتدريب وتخريج اجيال من اللاعبين، لانو بهالطريقة منكون عم نحقّق رسالتنا من الرياضة، يللي هي تحسين مجتمعنا وابعاد اولادنا عن الآفات البشعة، وبنفس الوقت عم نضمن استمرارية لنادينا بهالظروف الصعبة.
اليوم عم نلتقي لنطلق خطوة كبيرة على هالطريق، خطوة بتتمثّل بتوأمة بين تنين من اساطير كرة السلَة اللبنانية، تنين اوادم، بيجمعهم هدف واحد، هو خدمة الرياضة ومجتمعهم، ومن هيك التقوا بشكل طبيعي مع نادي عمشيت، جمعنا الهدف والرؤيا
رح اسمح لحالي بلّش احكي عن غازي بستاني، احد النجوم يللي وعينا على كرة السلّة معه، وعلى بطولاتو بالملاعب، كابتن منتخب لبنان سابقاً وحاليّاً رئيس لجنة المنتخبات في الاتحاد اللبناني لكرة السلّة، هالمنتخبات يللي ٣ منها وصلوا على بطولة العالم، ونتيجة شغل غازي خلقت اكاديمية اينرجي واحدة من اهم الاكاديميات بلبنان، فازت بكذا بطولة فئات عمرية، وبتضمّ أهم المدربين اللبنانيين، يللي كلهم مدربين منتخبات، اينرجي يللي اشتهرت بتخريج وتأسيس اللاعبين بالطريقة الصح، وما اشتغلوا ابدا بهدف التجارة. اهلا فيك غازي وباكاديميّة اينيرجي في نادي عمشيت.
صباح خوري، قد ما احكي عنه، بكون مقصّر، صباح بالنسبة النا اكتر من لاعب، او نجم، او اسطورة لكرة السلّة، هو صديق واخ ورفيق الدرب. مسيرته بلّشت هون على هالملاعب، وانطلق ليوصل على اهم البطولات، ويلعب باكبر الفرق، ويكون نجم كبير بكلّ مكان. ولأنو متل ما بحب على طول سمّيه، رمز الوفا، ما قبل الّا ما يرجع ويعطي كل شي لناديه وبيته، أسّس اكاديمية “ايليت باسكيتبول فاكتوري”، من حوالي العشر سنين لنادي عمشيت، ضم افضل المدربين، وكان هوي شخصيّاً موجود مع الاولاد، وما في لزوم اذكر ان صباح، كان ايام كتير يتكلّف اعباء مالية كبيرة منّو شخصيّاً، واكيد ما ربح ولا نهار من هالاكاديمية، بس كان دايماً هدفه يخدم مجتمعو، ويكون بناديه وبيته نادي عمشيت عم يعمل فرق. شو ما قول ما ممكن اوفيك تعبك وعطاءك لنادي عمشيت، بس كل شي فيني قول انو هيدا بيتك ولو منّك بآخر عشر سنين، ما كانت لعبة كرة السلّة بعدا موجودة بالنادي بلا جهودك، ولولا اكاديميتك يللي رفعتلنا راسنا بكتير بطولات.
لأنو دايماً منطلّع كيف بدنا نكبر، وكيف بدنا نتحسّن، ولحتى نادي عمشيت يواصل دورو الريادي بالنهضة الريّاضية، اجتمعنا، مع غازي وصباح، على نفس الهدف والرؤيا، لأنو كلنا عنّا نفس الهدف، وبالنسبة النا الريّاضة هي ريّاضة لا تجارة ولا سياسة، قدرنا نتفق لنوحد جهودنا، ونطلق اكاديمية اينرجي ايليت، من نادي عمشيت، لحتّى تكون من الافضل والاكبر بلبنان.
الطموح والاحلام كبيرة، اليوم نقطة الانطلاق، وحّدنا قوانا، والنظرة والرؤيا، اكيد رح نربح كتير بطولات، بس كمان اكيد واكيد رح تسمعوا باسماء نجوم جداد بكرة السلة رح ينطلقوا من هون ومن هالاكاديمية. رح اترك الكلمة لغازي وصباح، ليحكوا اكتر بالشقّ التقني والتنظيمي، بس بوعدكم انو اليوم اول الخطوة، بس الايام الجايي رح ننتقل من نجاح لنجاح”.

بستاني

بدوره، قال بستاني”اشكر الصديق يوسف على كلمته واعتز بالعمل مع المدرب صباح خوري .والمدرب ربيع فرنسيس كانت له اليد الطولى في هذه التوأمة وهدفها صقل جيل جديد في نادي عمشيت وتطوير قدرات اللاعبين الصغار والناشئين للوصول الى اعلى المراتب.أنا فخور بالتعاون مع رئيس نادي عمشيت يوسف قصيفي ومع المدرب صباح خوري لتخريج جيل جديد في هذا النادي العريق ليفتخر لبنان بلاعبين كبار في المستقبل”.
خوري

الكلمة الأخيرة للمدرب خوري جاء فيها”الشكر الى رئيس نادي عمشيت يوسف قصيفي والى مستشار كرة السلة في النادي جيلبير زغندي .انا مسرور بالتوأمة بين اكاديميتي “اينرجي” و”ايليت” لتخريج الأبطال وخوضهم المباريات خاصة في بطولات الدرجة الأول بالمستقبل ويدافعون عن الوان نادي عمشيت .هدف التوأمة ليس تجارياً ابداً .الجيل اليافع يحب كرة السلة .انا على علاقة متينة منذ زمن مع غازي بستاني ومع المدربين ربيع فرنسيس ومارون ديب . سنعمل على تشكيل فرق تنافس في جميع بطولات الفئات العمرية وفي بطولات لبنان “.